Artisti:	Naim Selmonaj
Viti:	2026
Materiali:	Çelik inox
Përmasat:	300 × 120 × 80 cm
Teknika:	Punim artizanal në çelik inox me ndriçim LED të integruar
Vendndodhja:	Gjenevë, Zvicër

Koncepti i veprës

"Dituria" është një skulpturë e konceptuar posaçërisht për Xhaminë Shqiptare në Gjenevë. Vepra ndërthur artin bashkëkohor me vlerat e besimit, përulësisë, dijes dhe bashkimit të komunitetit.

Në pjesën e sipërme, plisi shqiptar simbolizon identitetin, rrënjët dhe historinë tonë. Forma vertikale, e frymëzuar nga shkronja Elif, përfaqëson njëshmërinë, drejtësinë dhe lidhjen shpirtërore ndërmjet tokës dhe qiellit.

Sfera e brendshme shpreh përulësinë dhe gjendjen e lutjes, ndërsa Çelësi i Gjenevës, i integruar në bazën e veprës, simbolizon vendin ku kjo vepër merr jetë, mikpritjen, derën e hapur dhe bashkëjetesën ndërmjet komunitetit shqiptar dhe shoqërisë zvicerane.

"Përulësia na lartëson."

"Dituria" nuk synon imponimin, por reflektimin. Ajo bashkon identitetin, besimin dhe artin në një vepër që fton drejt dijes, respektit dhe bashkëjetesës.

Rreth artistit

Naim Selmonaj është skulptor zviceran me prejardhje shqiptare, i cili jeton dhe krijon në Zvicër që nga viti 1991.

Për më shumë se tri dekada, ai ka zhvilluar një gjuhë artistike personale përmes punës me metalin, veçanërisht me çelikun inox. Skulpturat e tij karakterizohen nga linja të lakuara, të ndërthurura dhe dinamike, si dhe nga ndërveprimi mes formës, materialit, dritës dhe hapësirës.

Krijimtaria e tij përfshin skulptura për hapësira publike, institucione, ekspozita dhe koleksione private. Çdo vepër konceptohet dhe realizohet si unikat, nga ideja e parë deri te përpunimi përfundimtar i metalit.